Жай солуу кезиу тийишли халда ётгенди

Быйыл Къабарты-Малкъарда жай каникуллада  эки жыйырма учрежденияда  8621 сабий солугъанды. Ол санда  тёрт стационар  саулукъгъа багъыу лагерьде – 3679, саулукъгъа багъыу онбир  учрежденияда - 2380, школланы мурдорларында къуралгъан лагерьледе – 1872 эм бир  санаторийде 690 сабий солугъанды, деп билдириледи Роспотребнадзорну КъМР-де управлениясыны сайтында.

Андан сора да, 35 сабий Кърымда «Артек» халкъла аралы сабий лагерьде  эм Краснодар крайда солугъандыла. 
Жай  лагерьледе    болум мардалагъа келишгенин тинтирча   Роспотребнадзорну келечилери 95 рейд бардыргъандыла. Аны чеклеринде жюзге жууукъ бузукълукъ ачыкъланнганды.    Аланы асламысы документле тапсыз жарашдырылгъанлары бла байламлы эдиле.  Болсада санитар-гигиена жаны бла эс бурурча шартла да аз болмагъандыла.   Ала административ  жууапха тартылгъандыла эм саулай 356 минг сом тазир тёлегендиле.  
Эсеплеп айтханда, жай солуу кампанияны хайырындан сабийлени 94,4 процентини саулукълары   игилендирилгенди.