Терек бахчалыкъны айнытыргъа алланып

Быйыл Къабарты-Малкъарда, алгъадан чыгъарылгъан эсеплеге кёре, жемиш бла наныкъдан 700 минг тонна жыйылгъанды. Ол былтыр бу заман бла тенглешдиргенде, 2,6 кереге кёпдю. Былтырны юсюнден айтханда,  жемиш  бла наныкъдан 680 минг тоннадан артыкъ чыкъгъанды, ол да буруннгу жылдан 27 процентге игиди, -деп билдиреди КъМР-ни Эл мюлк министерствосуну пресс-службасындан.

КъМР-ни эл мюлк министри Хасан Сижажев айтханнга кёре тирлик былтырдан эсе 20 минг тионнагъа кёп чыкъгъанды. Жылны ахырына тюз эсепле чыгъарылсала, бютюнда бек къууандырлыкъларын да къошханды. Саулай алып айтханда, кёгетчилик жаны бла къыралда 16 процентге ёсюм эсленеди. Ол бёлюмде уруннганларын да ачыкълайды. Бюгюнлюкде Къабарты-Малкъар жемиш бла наныкъдан 600 минг тоннадан аслам тирлик алады. Анга кёре, продукция бла кесин толу жалчытханлы эм артыгъын башха субъектлеге да сатханлы бир къауум жыл болады. Къыралда сагъынылгъан продукцияланы 16 проценти бизде ёсдюрюлгенледиле. Аны иги кесеги алма бла кертмеге жетеди. Алай аз болса да, мюлкледе балли, эрик, шаптал да салып башлагъандыла. Жуукъ заманда аладан да иги файда тюшюрюллюгю сакъланады.

Эсе сала айтсакъ, 2030 жылда республика жемишледен бла наныкъладан бир миллион тоннадан аслам бахчала орнатыргъа керекди.

Хасан Сижажев айтханнга кёре, бусагъатда регионда жемиш эм наныкъ бахчаланы саны 27 минг гектаргъа жетеди. Аланы иги ксеги, неда 23 минг гектары, терк айныгъанладыла. Болсада 2027 жылгъа аны 30 минг гектаргъа жетдирирге эм юч жылдан терекле иги чагъып башласа миллионлан аслам тонна тирлик алыргъа мурат этиледи.