Технологияланы айнытханланы белгилерикдиле

Къабарты-Малкъар Республиканы Башчысы Казбек Коков бу кюнледе «Къабарты-Малкъар Республиканы къырал саугъаларыны юсюнден» законнга тюрлениуле кийиргенди. Алай бла энди бизни республикада жюрюген сыйлы атланы санына энтта да бир жангысы къошулгъанды: «Информациялы технологияланы эмда связьны сыйлы ишчиси».

Бу ат информациялы технологияла эмда связь бёлюмде эм азындан он жылны ичинде бет жарыкълы уруннган, шёндюгю технологияланы айнытыугъа, игилендириуге, аланы эмда илмуда жангычылыкъланы сингдириуге, адамланы эмда организацияланы жумушларын жалчытыугъа уллу къыйын салгъанлагъа берилликди.

«Связь ышаннгылы ишлемей, информациялы технологияла да айнымай бюгюнлюкде бир иш этиллик тюйюлдю. Санкцияла салыннган сагъатда, къуру республиканы угъай, саулай къыралны да информациялы къоркъуусузлугъун жалчытыргъа керек болгъанында, бу бёлюмню айнытыу бютюнда магъаналы болады», - деп белгилегенди Къабарты-Малкъарны цифралы айныу министри Бёзюланы Аскер.

Кёк отлукъну хайырланыучулагъа эсгертиу

РФ-ни законодательствосунда болгъан тюрлениулеге тийишлиликде, кёп фатарлы юйледе жашагъан инсанла «Газпром газораспределение Нальчик» компания бла быйыл 31 декабрьге дери жангы келишим этерге керекдиле. Сёз анда газ оборудованиягъа къарау жумушланы жалчытыуну юсюнден барады. Келишимге къол салыргъа унамагъанлагъа компания газны тыяргъа эркинди. Аны юсюнден къыралны Правительствосуну 2013 жылда 14 майдан 410 номерли бегиминде айтылады. Соруулары болгъанла 8-800-100-09-04 номер бла сёлешсинле. Келишимни ма бу жерледе жарашдырыргъа боллукъду:

- «Газпром газораспределение Нальчик» компанияны бёлюмлеринде;

- «Газпром межрегионгаз Нальчик» организацияны абонент пунктларында;

- Нальчикде, Пушкин атлы орамда, 31 номерли юйде орналгъан Бирикген арада (ЕЦПУ).

Эл мюлкде эсепле бла шагъырейленнгендиле

КъМР-ни эл мюлк министри Хасан Сижажев бу министерствону Жамауат советини жыйылыууна къатышханды. Анда регионну эл мюлкю не халда болгъаныны, агропромышленность бёлюмню быйыл ал он айда эсеплерини юслеринден сёлешгендиле эмда келир жылгъа умутланы да белгилегендиле.

Министр билдиргенича, сагъынылгъан он айны ичинде бёлюм ёсюм кёргюзтгенди. Эл мюлк товарла чыгъарыучуланы бары да 53,1 миллиард сом багъасына продукция жарашдыргъандыла. Ол а, озгъан жылны ол кезиуюню кёрюмдюсю бла тенглешдиргенде, 109,5 процент болгъанды.

Хасан Сижажев дагъыда тирлик жыйыу иш къалай ётгенини юсюнден хапарлагъанды, аны эсеплери бла да шагъырейлендиргенди.

Докладыны ахырында: «Къабарты-Малкъарны агропромышленность комплекси битеу белгиленнген борчланы толтурургъа, битимчилик, малчылыкъ продукцияланы чыгъарыуну кёбейтирге, аш-азыкъ эмда жарашдырыучу бёлюмлени айныта барыргъа да таукелди», - деп чертгенди ол.