Къулийланы Къайсын атлы адабият салон

Алгъаракълада Къашхатауну Маданият юйюнде Къулийланы  Къайсын атлы адабият салон ачылгъанды. Ачылыугъа къуллукъчула, поэтни чыгъармаларын сюйгенле, сабийле да аслам келгендиле. Тюбешиуню аллында Къулбайланы Бэлла араны къураргъа амал этгенлеге жюрек ыразылыгъын билдиргенди. Бу ахшы жумушха къуллукъчула, эллиле да къууанып болушханларын айтханды. Аланы санында уа Санкт-Петербургда жашагъан бир жерлибизни, Россейни сыйлы къурулушчусу Чыпчыкъланы Русланнга энчи ыспас этгенди.

Ызы бла Черек районну администрациясыны башчысы Къулбайланы Алан бла КъМР-ни сыйлы артисткасы, Къайсынны юй бийчеси Къулийланы Элизат араны аллында къызыл тасманы  кесип, жыйылгъанла юйню ичине ётерча этгендиле. Салонда закий поэтибизни ташдан ишленнген  сураты, белгили жазыучула бла тюшген  суратлары бардыла, назму китаплары бла танышыргъа, аланы окъургъа да боллукъду мында. Къонакълагъа Къайсынны чыгъармачылыкъ, жашау жолуну юсюнден да айтхандыла, аны бла байламлы жарашдырылгъан видеороликле бла да шагъырейлендиргендиле.

- Битеу районну бу ахшы жумуш бла алгъышлайма. Къайсынны хар сёзю да бизге аманатды. Акъылманны чыгъырмаларын тинтген алимле аны тизгинлеринде тюбеген таза ниетлиликге, жигитликге поэтни саулай жашауу да юлгюдю деп чертедиле. Бу уа магъаналы проектди, быллай арала хар районда да къуралсала,  аламат боллукъду. Мында жангыз Къайсыннга угъай, башха белгили поэтлерибизге, акъылманларыбызгъа аталгъан тюбешиулени, адабият ингирлени да бардырырчады,- дегенди «Заман» газетни баш редактору Къонакъланы Хасан.

Ызы бла ол дуниядан замансыз кетген Къонакъланы Мустафаны юсюнден кеси жазгъан китабын адабият салоннга саугъагъа бергенди. Анда, Мустафаны жашау жолундан сора да, халкъыбызны адетлери, тёрелери  бла байламлы илму иши да басмаланнганын билдиргенди. Ол а абаданланы, сабийлени да миллет сезимлерин ёсдюрюрге магъаналы пособие болгъанын белгилегенди ол.

Тюбешиуде школчула, малкъар тилден бла  адабиятдан окъутхан устазла да поэтни «Жашау», «Ана тилим», «Когда на меня навалилась беда», «Мамырлыкъ, къууанч, сизге, саула», «Сабийле ёлмесинле»  деген терен философия магъаналы назмуларын шатык, хар тизгинни да адамланы жюреклерине жетдирип окъугъанларын энчи белгилерчады. Дагъыда Къашхатауну маданият юйюнде юйреннген  ариу ёнлю Къадырланы Джаннета, Тёппеланы Светлана бла жырчы  Алчакъланы Артур поэтни назмуларына жазылгъан жырла бла къууандыргъандыла.

Черек районну администрациясыны башчысы Къулбайланы Алан да поэтни чыгъармалары хар таулу инсаннга энчи магъана тутханын чертгенди. Къайсын халкъыны атын саулай дуниягъа игилик бла танытханын, аны тизгинлерин белгили къуллукъчула жорукъгъа тутханларын да энчи сагъыннганды. Салонну ачылыуунда кесип алгъан тасманы уа кесинде, саугъача, тутаргъа сюйгенин айтханды.

Къулийланы Элизат да адабият араны ачылыууна себеплик этгенлеге, бу жумушха къатышханлагъа да ыразылыгъын билдиргенди.

- Кёлюм толду сабийле назмула окъугъанларында. Быллай аламат жумуш къурап, Къулий улуну жашаууну, чыгъармачылыгъыны юсюнден  жылы сёзлеригизге да бек ыразыма. Бюгюн айтылгъанча, аны хар тизгини да дунияда жашагъанлагъа насийхатды. Ол кеси кёрген къыйынлыкъланы бир адам да, бютюнда сабий,  сынаса, сюймегенди. Келир тёлюлеге да тынчлыкъ, мамырлыкъ тежегенлей тургъанды. Акъылман айтханча, халкъыбызгъа, къыралыбызгъа, дуниягъа да ырахатлыкъ тилейме,- дегенди Элизат Эльбаевна.

Тюбешиуню ахырында уа жангы арада абаданла, сабийле да жыйылып, эсде къалырча суратха тюшгендиле.