Шахарны сыфаты айбатландырылгъанды

КъМР-ни Къурулуш эмда жашау журт-коммунал мюлк министерствосундан билдиргенлерича, Къашхатауда «Иги шахар болум къурау» миллет эм «Жашау журт эм шахар тийре» къырал программагъа кёре   жамауат аслам хайырланнган эки объектни эм алты арбазны жангыртхандыла.

Ишлени кезиуюнде шахарда тозурагъан тротуарны игилендиргендиле, физкультура эм саулукъ кючлеу комплексни къатында жаяу жолчукъну да салгъандыла. Сагъынылгъан объект 2020 жылда «Демография» миллет проектни чеклеринде ишлегенди. Андан сора да, Уяна, Мечи, Носту улу, Октябрьская орамлада да кёп фатарлы алты юйню арбазы айбатландырылгъанды. Ала кёп жылланы ичинде   ремонт этилмегени, иги да тозурагъан объектле эдиле. Ол себепден жашау журтлада жашагъанла, эрттеден бери игилендириу ишлени ашыгъып сакълагъандыла.

Эсге сала айтсакъ, буруннгу жылда да Къашхатауда кёп фатарлы жети юйню арбазы тапландырылгъанды. Сагъынылгъан миллет проектни эм программанны хайыры бла шахарны сыфатын айбатлы этерге эм адамланы болумларын да игилендирирге онг табылады. Арт заманда шахарны игилендириуге жамауат да тири къатышады. Адамла ол кётюрюу амал бла тынгылы ремонт этилирге тийишли объектлени сайлап, администрациягъа болушадыла.