Аш-азыкъны сатыуда эсгертиуле

Социал магъаналы продуктланы жыйышдыргъанда ГОСТ-лагъа тюзетиуле кийирилгендиле. Алагъа кёре производительле энди бир орунда 9 гаккы неда 920 эм 985 миллилитр сют сатаргъа эркин тюйюлдюле, деп билдиредиле Генпрокуратураны пресс-службасында.

Биринчи кереклиге продовольствие товарлагъа саналгъан продуктланы чыгъаргъанла бу жорукълагъа сыйыныргъа тийишлидиле: гречканы орунлагъа 500, 1000 эм 2000 грамм салыргъа, сютню уа 200, 250, 500, 1000 эм 2000 миллилитр къуяргъа. Быллай продуктлагъа дагъыда чёплеу эм сары жау, тюрлю-тюрлю крупала бла макаронла, хант туз, бал туз, къара чай киредиле.

Генпрокуратурада чертгенлерича, бизнесни келечилери продуктланы аз салып, аны бла бирге уа багъаланы ёсдюрюрге излейдиле. Аллай болумланы эсепде тутарча ведомство дайым тинтиуле бардыргъанлай турлукъду. Жангы жорукъланы кийириуге уа Промышленность эм сатыу-алыу, сора Эл мюлк министерствола да къошуллукъдула.

Предпринимательствону эм экономиканы айнытыу институтдан эсгертгенлерича, орунну  азайтып предпринимательле 2008-2009 жылладагъы къытлыкъны  кезиуюнде башлагъандыла. Ол законну бузмагъанды, нек дегенде аны тышында керти ауурлулугъу жазылгъанды.