Солургъа, саулукъну кючлерге да – аслам онг

Къабарты-Малкъарны курортла эм туризм министрини орунбасары Асланби Шхагапсоев ТАСС-да видеокоференция халда болгъан келир къыш солуу кезиу башланнганына аталгъан жыйылыугъа къатышханды. Анда ол республикабызны адамланы солууларын къурауда онгларыны юсюнден айтханды.

Ол белгилегенича, республика тау-лыжа эм спорт туризмни арасыды. Бюгюнлюкде Элбрусну инфраструктурасы иги айныпды, анда битеулю узунлукълары 37 километрге жетген 19 тау лыжа жол, гондол, маятник, бугель эм кресель 11 канат жол, бир кереге 7 минг адамны сыйындырырча къонакъ юй бардыла. «Мында солугъанланы саны ёсе барады, бир бири ызындан юч жылны ичинде республикагъа бир миллиондан аслам адам келгендиле, алай болуруна федерал ара бла республиканы властьлары да уллу себеплик этгендиле. Быллай болумлада туристлени солууларын бютюн иги къурауну, аланы къоркъуусузлукъларын тийишлисича жалчытыуну магъанасы бютюн ёседи. Жангы сезонда хайырланыугъа дагъыда эки канат жол, учуу жер бла къошакъ 6,5 километрлик лыжа жолла берилликдиле. Сора  3500 машинаны сыйындырырча жерле да къуралырыкъдыла, алайдан учхан жоллагъа дери адамла хакъсыз жетдирилликдиле», - дегенди ол докладында. 

 МЧС-ни, МВД-ны, жоллагъа къарагъан органланы келечилерини къатышыулары бла ведомстволу аралы комиссия къуралгъанды, сынам кёргюзтгенича, ол ишин жетишимли да бардырады – къоркъуусузлукъну, солууну да качествосу ёсгенди. «ГранТуризмо» проектни чегинде регионну туризм предприятиялары кавказ къонакъбайлыкъны бир жорукълары кийириледиле. Ол башламчылыкъны хайырлылыгъына уа Къабарты-Малкъарда солуп кетген адамланы  аны юсюнден ахшы оюмла жазгъанлары шагъатлыкъ этеди. Минги тауда лыжа сезон декабрьде башланып, июньну ахырына дери барады, алай кюнню халына кёре аны алгъаракъ ачаргъа да болады.

Туристлеге таплыкъгъа «бир» билет система да ишлейди, аны болжалы 2024 жылны мартыны ахырына дериди. Анга кёре пассажирле Минеральные Воды темир жол вокзалдан Элбрусха дери автобус бла жетерикдиле. «Мир» банк картала бла уа канат жоллада барыуну тёлерге жарарыкъды.

Минги тауда къыш солуу жангызда лыжала бла чекленип къалмайды. Былайы сынамлы, жарауларын энди башлагъан райдерлеге да сейирди, ски-турла – лыжалада канат жол бла жетерге онг болмагъан чурумлу жерледе барыу, бэккантри – тау тиклеге жаяу минип, артха уа лыжалада учуу – бу амал бла алыкъа жашырын жерлени кёрюрге боллукъду. Тюрлю-тюрлю байрамланы къарлы таулада белгилерге сюйгенлеге уа Жангы жыл, Къар гинжилени, сноупаркны ачылыуу зауукълу ётдюрюлгенди.

Саулукъ кючлеуде да онгла асламдыла: жылну узуну ишлеген 20-дан аслам санаторий барды, Аушигер, Гедуко, Лячинкъая, Янтарное, Светловодское багъыу суулары бла белгилидиле. «Нарзанла таласы» бальнеология курортда нарзанла бла кезлеуледе саулукъну кючлерге боллукъду, анда сабийлеге заманларын зауукълу ётдюрюрча майдан да ишленнгенди. Чирик Кёлле, Чегем чучхурла – туристле къараргъа сюйген ариу табийгъат жерле, «Огъары Малкъар», «Огъары Чегем» тарых-археология комплексле эм башха белгили курортла да адамланы сакълайдыла. Тёрткюнлюк «Къабарты-Малкъарны юч ауузу бла деменгили Элбрус» маршрутну сайлагъанла уа ариу къудуретни кёрлюкдюле, халкъларыбызны  маданиятлары бла шагъырейленирикдиле, тёрели ашладан да татырыкъдыла.

Кульчаланы Зульфия.
Поделиться: