Жангы жырла, терк тепсеуле, спекталькден юзюк

Озгъан орта кюн, КъМР-ни сыйлы артисткасы  Мамайланы Фатимат бла Газаланы Махмут къурап,  «Тау той» деген уллу концерт ётгенди. Ол Малкъар халкъны къыраллыгъы къайтарылгъан кюннге жораланнганды. Анга режиссёрлукъну да Фатимат кеси этгенди. 
Музыкалы театрны уллу залында олтурур жер жокъ эди.  Къабыргъалада уллу экранлада уа кёчгюнчюлюк бла байламлы суратла, «Дорога на край жизни» деген фильмден юзюкле бир бирлерин алышындыргъандыла. Къулийланы Къайсынны ол бушуулу ишге жораланнган назмусу  окъулгъанды, Отарланы Омарны жырлауунда сюргюнню юсюнден жыр эшитилгенди. Битеу ол затла концертге келгенлени эслерин кеслерине бурмай къоймагъандыла.  
Къууанчлы ингирни Жангуразланы Мажит бардыргъанды. Ол, ары келгенлени къызыу алгъышлап, малкъар халкъ угъай да, башхала да сюргюнлюкню ачыуун сынамазларын сюйгенин билдиргенди. Сахнагъа чыкъгъан андан башхала да ариу сёзлерин аямагъандыла. 
Концертде кёпле сюйген, билген жырла, назмула эшитилгендиле, жангылары да айтылгъандыла. Аладан бирин Къабардокъланы Зухура къараучулагъа саугъа этгенди. Атмырзаланы Элдаргъа, Аппайланы Исламгъа, Гергъокъаланы Халиматха, Холамханланы Къайсыннга, Жаникаланы Элдаргъа, Габаланы Тенгизге, Жаболаны Замирагъа, Мамайланы Фатиматха, Къабардокъланы Зухурагъа, Занкишиланы Маратха, Созайланы Натугъа, Абдуллаланы Фатиматха, «Жашлыкъ», «Ас-Аланла» той-оюн къауумлагъа да залдагъыла толкъун къарсла бла ыразылыкъларын билдиргенлей тургъандыла. 
Тепсегенлеге да адам сюйюп къарарча эди. «Балкария» фольклор-этнография къырал ансамбль, Жанатайланы Ирэнаны башчылыгъында шёндю жаратыла келген «Кавказны ёхтемлиги» да жыйылгъанланы къууандыргъандыла. Къарачай-Черкесден да къонакъла келген эдиле. Тамбийланы Къаспот жырлагъан да этгенди, малкъар халкъгъа жоралагъан жангы назмусун да окъугъанды. Дагъыда Байкъулланы Солтан, Будайланы Сухель ариу ауазлары бла зауукълукъ тапдыргъандыла.  Театрыбызны артистлери Мамайланы Фатимат, Созайланы Мариям, Мызыланы Аубекир  «Африканец» сахна оюндан юзюк кёргюзтгендиле.
Байрам концерт керти да аламат болгъанды. Аны жаланда бир кемчилиги бар эди - белгиленнген заманында башланмагъаны. Къыркъ минутха кечикгенди. Алай къараучуланы бир -бирлерини  низамсызлыкълары да сейир этдиреди. Концерт ма алай кеч башланнгандан сора да келгенле бар эдиле.

 

Холаланы Марзият. Суратланы автор алгъанды.

Свежие номера газет Заман


11.07.2018
09.07.2018
06.07.2018
04.07.2018