Тарыхны билиу – шуёхлукъ байламлыкълагъа себеплик

«Социо-маданият проектлеге болушлукъ этиу эм айнытыу «Мирт» ара» коммерциялы болмагъан организацияны башламчылыгъы бла Къабарты-Малкъарны Жамауат палатасында, 115-чи атлары дивизияны тарыхына жораланып, кишиликни регионла аралы дерси къуралгъанды. Анга «Биринчилени къымылдауларыны» Къабарты-Малкъарда бла Ростов областьны Мартыновский районунда бёлюмлерини келечилери чакъырылгъандыла, дерс онлайн халда ётгенди.

 «Бир дивизияны тарыхында уруш бла мамырлыкъ» проектни эм «Мирт» араны башчысы палатаны келечиси Юлия Ордокова, эм алгъа, жаш адамлагъа, Уллу Ата журт урушну юсюнден соруула берип, дивизияны юсюнден къысха билдиргенди. Ол белгилегенича, ата-бабаларыбыздан къуралгъан дивизия ёлюмден къоркъмагъанды, душмандан къачмагъанды, къанлы сермешледе талай заманны Мартыновканы къоруулай, аны тёрт мингнге жууукъ аскерчиси жан бергендиле.

Аланы жигитликлерини юсюнден толурагъ а КъМР-де ДОСААФ-ны ветеранларыны советини башчысы Хусейн Мацухов бла «Кавказ рубеж» излеу къауумну соучредители Беслан Гуляжинов айтхандыла. Ала дивизия къалай эм не мурат бла къуралгъаныны, анга республикада жашагъан миллетлени барысыны да келечилери киргенлерин чертгендиле. «Бу дерсни баш борчу ата-бабаларыбызны жигитликлерин ёмюрлюк этиудю, туудукъла аладан Ата журтха кертичиликни, сюймекликни юлгюсюн алырча этиудю», - дегенди Хусейн Мацухов. Беслан Гуляжинов да, дивизиягъа тёрт минг бла беш жюз адам киргенин эсгертип, аны энчи полкларыны, аскерчилерини юслеринден айтханды эм къазауатла баргъан аулакълада жыйылгъан артефактланы кёргюзтгенди.

Мартыновский райондан а администрацияны башчысыны орунбасары Наталья Гончарова, Большая Мартыновка элни биринчи мектебини директоруну орунбасары «Биринчилени къымылдауларыны» жер-жерли бёлюмюню башчысы Елена Чванова, районну краеведение музейини директоруну къуллугъун толтургъан Светлана Хижникова эм башхала сёлешгендиле. Ала билдиргенлерича, Мартыновкада баш орамладан бири «Къабарты-Малкъар» деген атны жюрютеди, талай орамына дагъыда дивизияны аскерчилерини атлары берилгендиле, аланы эсгертмелерине къаралады, сабийлеге мамырлыкъны къоруулай ёлген уланларыбызны юсюнден дайым айтылгъанлай турады.  

Кишиликни дерси «Биринчилени къымылдауларыны» Мартыновский районда бла бизни республикада бёлюмлери байламлыкъла жюрютюрге келишгенлери бла бошалгъанды.

«Бир дивизияны тарыхында уруш бла мамырлыкъ» проект 1 августда бардырылып башланнганды. Аны чегинде 2023 жылда 30 ноябрьге дери жаш адамла бла тюбешиуле боллукъдула. Мураты уа жыл сайын дивизияны аскерчилерин хурметлеуню, аланы эсгериуню юсю бла Уллу Ата журт урушну жигитлерини атларын ёмюрледе сакълаугъа къошумчулукъ этиудю эм республикабызны тарыхын тинтиу ишни тирилендириудю. Аны жашауда бардырыргъа болушлукъну Къабарты-Малкъарны Жарыкъландырыу эм илму министерствосу, Жамауат палатасы, Битеуроссей халкъ фронтну регион бёлюмю этедиле.

Проектни чегинде Нальчик, Терек, Бахсан шахарлада бла Кахун элде кишиликни дерслери, Ростов область бла Къалмукъ Республика бла регионла аралы онлайн-конференцияла, илму-практика конференция, жаш тарыхчыланы форуму къураллыкъдыла, дивизияны юсюнден видеофильм алынырыкъды, 20 брошюра бла проектге къатышхан мектеплеге 8 плакат басмаланырыкъдыла. Жыйылгъан материалланы уа устазла, алимле, республикабызны тарыхын теренирек билирге излеген адамла хайырланаллыкъдыла.

Кульчаланы Зульфия.
Поделиться: