АНТ

Темуккуланы Адилни кезиулю хапарларын басмалайбыз. Аны жигитлерини къадарлары кимни да эсин бурурчадыла. Бу жол да аладан бири бла сизни шагъырей этерге сюебиз.

 Артурну  бла Маринаны студент жыллары балча татлы ёте баргъан эдиле. Биринчи курсда танышып, бир бирни жаратдыла. Башха факультетледе окъугъанлары да чырмау болмагъанды  сюймекликлерине. Университетни  китапханасы эди аланы тюбешиу жерлери. Окъуй-жаза кетип, ашхамда тышына чыкъгъанларында уа, жашагъан общежитлерине баргъан жоллары бек къысха кёрюне эди. Артур медицина факультетни бошаса, хирург боллукъду, Маринаны усталыгъы уа – устазлыкъды.

Нальчикни паркында солуй айлана, была келир жашаулары къалай боллугъуну юсюнден кёп оноулашхандыла. Аллай заманлада Артур – аны макъамы ариу эди – Байчеккуланы Абидинни «Сюймеклик вальсын» (ол заманлада бу жыргъа «Студентлени вальсы» деп да айтыучу эдиле) жырлаучу эди:

Сени бетинге тёгюле турады

Жарыкъ нюрю толгъан айны...

Былайда, хар заманда болуучусуча, жыргъа Марина да къошулуп, андан арысын бирге жырлар эдиле:

Тауладан келген салкъын аязчыкъ

Чачынгы сабыр сылайды.

Окъууну бошап, Марина шахарны бек иги школларындан биринде ишлеп башлады. Артур а Москвагъа ординатурагъа кетди. Анда Склифосовскийни атын жюрютген институтда ординатураны ёте, къыралда атлары айтылгъан хирургла этген операциялада болушлукъчу бола тынгылы сынам алгъандан сора уа, кеси да энчи операцияла эте, илму сынаула да бардыра, айтхылыкъ хирург болду. Анга насийхатчылыкъ этген махтаулу, дунияда аты айтылгъан кардиохирург Лео Бокерия: «Мында къал, илму бла кюреш, сенден аламат илму къуллукъчу чыгъарыкъды»,– деген эди. Алай жюреги практикалы хирургияны  сайлап, Артур Москваны тийресинде уллу курорт шахарда ара кардиология клиникада кардиохирург, эки жылдан а хирургия бёлюмню таматасы болуп махтаулу урунады.

Марина уа, Марина… Артур Москвагъа кетген жылны ал айларында экисини ортасы бек татлы эди. Бир бирге къагъыт (ол заманда хуржун телефонла жокъ эдиле) жазып турдула. Жаш бир ненча кере Нальчикге келген эди. Ол кезиуледе биягъы паркда солуй, айлана, Абидинни жырын эслерине тюшюре эдиле. Бу айтхылыкъ композитор, жырчы, макъамчы экисини да ючюнчю шуёхлары болуп къалгъан эди. Артур Москвада терезе аллында сюелип, аз сагъышланмагъанды, ичинден жырлай:

Иги кесек заманны Маринадан къагъыт болмагъанына тёзалмай, Артур Нальчикге  келди. Такси сакълап бир кесек мычыргъа тюшгенде, аны аллы бла болмагъанча омакъ жасалгъан той машинала озгъанда, жюрегинде бир хычыуун сезимле къозгъалдыла. Кесине кёл этди: манга да кёп къалмагъанды – школда окъуу жыл бошалгъанлай, Марина бла мени тоюбузда да машинала былай тизилирле…

Сюйгени ишлеген школгъа киргенинде, сезди: жюреги, нек эсе да, къайгъылыды. Къайгъылы болмай а, бусагъат сюйгенинге тюберик ушайды да… «Сизге ким керекди?» - деп сёлешди эшикни сакълагъан къартыракъ тиширыу. «Марина. Аны чакъырсагъыз эди». – деди Артур

- Марина бюгюн ишлемейди. Бюгюн аны бек къууанчлы кюнюдю. Аны тою болады. Устаз коллектив ол къууанчха тебиреп турады. Сиз да ала бла барыргъа боллукъсуз, сюйсегиз,– деп жууаплады ол.

 Аны эшитгенлей, Артур, артха бурулуп, тышына суху чыгъып кетди. Ол кюн окъуна самолётда учуп, ызына къайтды. Юйде кече терезеден ачыкъ кёкде жулдузлагъа къарап, ичинден бу тизгинлени къатлады:

  - Абидин, сен къаллай ариу сёзле, къаллай ариу макъам тапхан эдинг бу терен сезимни суратларгъа! Алай, не медет, сени жырынг жашаудан кенгди, узакъды…

…Артур бу шахарда ишлегенли, беш жылдан атлагъанды. Энди къуру мында угъай, Москва областьда,  ара шахарда да бек уста кардиохирургланы тизмесинде биринчиди. Бу айтылгъан Артургъа озгъур махтау салгъанча кёрюнмесин. Арт заманда анга план бла этиллик операцияланы бермейдиле, аланы башха врачлагъа буюрадыла. Артурну жаланда болжалсыз (экстренный) халда этилликлеге саладыла, аланы да бек жууаплыларына. Ол хыйсапдан болур, байла, бизнесменле, уллу къырал къуллукъчула, кеслеринде, не ахлуларында  жюрекге операция керек болса, шашмай Артурну излейдиле…

Маринаны уа унуталмайды, жашны жюрегине ол салгъан жара иги болмайды, бютюн бек ачыта, къозгъала барады. Билемисиз, Артургъа айып этерикле табыллыкъ сунама. Ала былай ойларгъа боллукъдула: тёгерекде-башда кёз къаматырча ариу къызла топпа-толу. Маринасын нек унуталмайды? Аны ёхтемлиги къайдады!? Алай ол ёхтемликден тюйюлдю. Орусча Артурчалагъа ОДНОЛЮБЫ дейдиле.

Марина уа кесин бек насыплыгъа санап жашайды. Эри бизнесменди, бек бай, къолайлы. Кёп тыш къыраллада айланнгандыла, белгили курортлада солугъандыла. Алыкъа сабий къайгъылы да болмагъандыла: жетиширбиз, дунияны кёрейик, жашауну татыуун ангылайыкъ деп.   

Марина Артурну эсине тюшюрмейди: насыплыла башхаланы сагъышын эте билмейдиле. Энди Абидинни жырын да ол эрине жырлайды:

Сени бла бирге тургъан жылларым

Манга бир кюнча кёрюне,

Кеси жанымы да унутама,

Акъылым санга бёлюне.

Абидинни сюймеклик макъамына кеси сёзле къурайды: жюрек къууанса, назмула тизген ишмиди?! Ма бюгюн да Марина эри бла Подмосковьени айбат курорт шахарына келипдиле. Кеслерине къонакъ юйде «люкс» номер алып тохташдыла…

Ахыры 14 ноябрьде басмаланырыкъды.