Ана тилге бла ариу къылыкъгъа тюшюндюре

Нальчикни алтмыш ючюнчю сабий садыны мурдорунда ана тилледен юйретгенлени республикалы  семинарлары къуралгъанды. Ол «Мектепге дери билим бериуде малкъар тилге окъутууну болушлугъу бла сабийлени жамауатда тохташдырылгъан мардалагъа тюшюндюрюу» деген тема бла байламлы бардырылгъанды. Аны муратларындан бири уа алыкъа школгъа жюрюмеген  сабийни ана тилни сейирлигине бла ариу къылыкълы болууну ышанларына юйретиу болгъанды.

Сабий садны ол кюн хурметли къонакъларыны арасында уа КъМР-ни жарыкъландырыу эмда илму министри Анзор Езаов, Нальчик шахар администрацияны Билим бериу департаментини башчысы Алим Мальбахов, Педагогикада ишлегенлени хунерликлерин тохтаусуз ёсдюрген араны директоруну къуллугъун толтургъан Артур Кажаров, республиканы билим бериуюню бла маданиятыны келечилери, башхала да болгъандыла.

Ол кюн садикде жумушла малкъар тилде бардырылгъандыла. Сабийле закийибиз Къулийланы Къайсынны халал къумурсханы юсюнден жомагъы бла байламлы сахна оюн да кёргюзтгендиле.

Орта къауумгъа  жюрюгенчикле уа ана тиллеринде къалай сёлеше  билгенлерин, аланы сёлешиу тиллерин юйретиучюле къаллай амалланы болушлукълары бла айнытханларын ачыкълагъандыла. Бу бёлюмде  ала «Мени туугъан шахарым» деген тема бла ишлегендиле.

Адабият-музыкалы бёлюмде да Къулий улуну «Мамырлыкъ, къууанч сизге, саула!» деген тизгинлери темагъа алынып, чыгъармала да ол ызда окъулгъандыла, жыр, тепсеу да анга кёре болгъанды.

Къонакъла  юйретиучюлени сабийле бла бардыргъан ишлерине бийик багъа бергендиле эмда ёсюп келген тёлюню ол ызда тюшюндюргенлери ючюн ыспас этгендиле.                

Трамланы Зухура.
Поделиться: