Аланы кишиликлери, антха кертичиликлери юлгю болгъанлай къаллыкъды

Ич ишлени органларында ишлегенлени кюнюне

2005 жылны 13 октябри Къабарты-Малкъарны, артыкъда аны ара шахарыны жамауатыны эсинде бушуулу кюнча къалгъанды. Аны мамырлыкъгъа батылып жашагъан адамлары ол кюн эрттенликде элгенип уяннгандыла. Тёгерек окъ-топ тауушдан толуп, шахар уруш майданнга айланнган эди. Право низамны сакълаучу органланы энчи составлары терк окъуна сагъайгъандыла, сауутланнган къауумлагъа къажау таукел сюелгендиле. Бизни мамыр жашауубуз ючюн къанларын-жанларын аямай къазауат этгендиле, жигитликлери бир заманда да унутуллукъ тюйюлдю. Бюгюн биз мамырлыкъны, тюзлюкню къоруулай, жанларын бергенлени  бир къауумун эсгеребиз.

     РФ-ни Наркоконтролюну федерал службасыны КъМР-де Управлениясыны оперуполномоченныйи тамата лейтенант Нёгерланы  Магометни жашы Рашит боевиклеге къажау батыр сюелгенди, мамыр адамланы къутхарыр ючюн, кесин аямай кюрешгенди.  Нальчикге чабыууллукъ этилген кюн Рашит ишинде эди. Управленияны таматасы энчи составха рация бла хапар берип, мекямдан тышына чыкъмазгъа, аны ичине тыш адам кийирмезге буйрукъ бергенди. Алай коллективни хар  адамыны юйюнде сабийи, ахлусу къалып, ала тынгысыз эдиле.  Буйрукъну бузаргъа уа базынмагъандыла.

Рашит, къалай эсе да, тышына къутулуп, 5-чи номерли орта школну къатында баргъан къазауатха кирип къалгъанды.  Алайда устазланы, школчуланы да къоркъуусуз жерге элтирге болушханды, кесини гитче къарындашы Руслан бла бирге болгъанды. Жууукъ адамларына телефон бла сёлешип, сау болгъанларын билип, артха, иши таба тебирегенди.  Бара тургъанлай, сауутланнган боевик мамыр адамны ырбыннга тыйып тургъанын кёрюп, анга жанында керохдан атдырып башлагъанды. Окълары тауусулуп, керохун жангыдан жерлейме деген кезиуде автоматдан атып, аны жашауун юзгендиле.

Туугъан шахарына къыйынлыкъ тюшген кюн эр жюрекли 25-жыллыкъ жаш ёлеме деп къоркъмагъанды. Адамлыкъ борчуму толтурайым дегенди. Аны жигитлиги унутуллукъ тюйюлдю. Анга Нальчикни 14-чю номерли гимназиясында эсгериу къанга салыныпды. РФ-ни Президентини Указы бла Нёгерланы Рашит Кишиликни ордени бла саугъаланнганды.

 Милицияны тамата лейтенанты Дышеков Тимур Исуфович да ол бушуулу кюн  къуллугъун бардыра тура эди.  Боевикле чапханлай, ол патруль-пост полкну административ мекямыны тийресин къоруулауну къолгъа алгъанды къалауурда болгъанлагъа башчылыкъ этгенди, боевиклеге къажау арсарсыз сюелгенди.

Боевикле муратларына жеталмагъанларын кёргенде, алайдан башын алып къачхандыла.  Тимур  а кесини тукъум къарындашы тамата лейтенант Дышеков Замир бла бирге аланы ызларындан къуугъанды. Аманлыкъчыла «Газель» автомашинагъа мине тургъанлай, Тимур алагъа от ачханды. Алай бандитледен бирлери пулемётну аны юсюне  буруп, жигит жашны жашауун юзгенди. Батыр жаш боевиклеге къажау кюрешде этген жигитлиги ючюн Россей Федерацияны Президентини Указы бла Кишиликни ордени бла саугъаланнганды (ёлгенден сора). 

 Милицияны тамата сержанты Сергей Москаленкогъа уа  бандитле бла андан алгъаракълада окъуна тюбеширге тюшгенди. 2005 жылда 23 апрельде ол патруль-пост службаны инспекторларыны къауумунда Калюжный орамда «Мотор» гараж-къурулуш кооперативни тийресинде болгъанды. Нёгерлери бла бирге водительледен бирини документлерине къарай тургъанлай, гаражладан биринден, сунмай тургъанлай, бир белгисиз адам алагъа от ачханды.  Сергей, ауур жаралы болуп, алайда окъуна ёлгенди.

 Анга жаланда 25 жыл толгъан эди. Ол Нарткъалада асыралгъанды.  Кишиликни ордени  анга ёлгенден сора берилгенди. Аны хурметине шахарда 2- номерли школда эсгертме орнатылгъанды.

Милицияны тамата лейтенанты Шомахов Тимур Каралбиевич да Кишиликни орденине тийишли болгъанды (ёлгенден сора). 2005 жылны 13 октябринде ол кесини автомашинасы бла Нальчикден чыгъып, Чегем шахаргъа атланнган эди. Боевикле жолну аллын тыйып, жолоучуланы армаугъа къоюп тургъанларын кёргенде, тамата лейтенант, машинасындан чыгъып, низам тохташдырыр къайгъыгъа киргенди.

 Милиция кийимли адамны кёргенлей, бандитле аны юсюне окъ жауун жаудургъандыла. Тимур Шомахов адамланы ёлюмден къутхарыр ючюн къазауатха кирип, тюзлюк ючюн жан бергенди.

 2005 жылда 13-чю октябрьде, андан сора жыллада да право низамны сакълаучу органларында къуллукъ эте тургъанлай, республикада мамырлыкъны бла ырахатлыкъны къоруулай  кёпле жан бергендиле. Бир статьяда аланы барысын да сагъыныр онг жокъду. Аланы атлары бир заманда да унутуллукъ тюйюлдю. Жигитликлери уа  ёсюп келген тёлюлеге кишиликни, батырлыкъны, чыныгъыулукъну, антларына, Ата журтларына да кертичиликни юлгюсю болгъанлай турлукъду.

 

Текуланы Хауа хазырлагъанды.
Поделиться: