Эллеге билимли, тири жаш тёлю керекди

Къабарты-Малкъарны Жамауат палатасыны Агропромышленный комплекс, табийгъат байлыкъланы хайырланыу, къудуретни сакълау эм экология жаны бла комиссиясы кезиулю жыйылыуун Май районну Ново-Ивановское элинде 7-чи лицейде бардыргъанды. Анга жаш тёлюню ишлери жаны бла министерствону, жаш тёлю политика жаны бла специалистле, районну шахарларыны эм эллерини башчылары къатышхандыла. Ала жаш тёлюню башламчылыкъларын жашауда бардырыуда къаллай болушлукъ этилгенин, жаш адамла айнырча, социал жашаугъа тири къатышырча не онгла болгъанын сюзгендиле. Энчи эс добровольчествону айнытыугъа, жаш тёлю муниципал даражада оноула чыгъарыугъа, жамауат-политика ишге къошулурча этиуге бёлюннгенди.

Комиссияны башчысы Юрий Колесников белгилегенича, жаш тёлю политикада эм уллу проблема иш бла жалчытыу бла байламлыды. «Саулай да округда жаш адамла жамауатны къорууланмагъан, къырал болушлукъ керекли кесегидиле. Республиканы Парламенти 2022 жылны 21 апрелинде «КъМР-де жаш тёлю политиканы юсюнден» законну къабыл кёргенди, районда да «Май районну жаш тёлюсю 2022-2026 жыллада» деген программа жарашдырылгъанды. Аны толтурууну чегинде элдеги жаш тёлюге иш тапдырыу, юлгюлю жаш юйюрню ниетлерине юйретиу, ала юйюр къурауну дурус кёрюрча, сабийлени ариу халда ёсдюрюрча мадарла этиледиле», - дегенди.

Юрий Колесников предпринимательство бла кюрешген жаш адамлагъа ахча эм консультация жаны бла себеплик этиуню, ала ишлерин башларча майданла къурауну юсюнден да айтханды. Жыйылгъанла чертгенлерича, эллени айнытыу къыралны социал-экономика политикасында энчи жерни алады. Баш мурат тири, билимли жаш адамла эллеринде къайтырча, анда жашаргъа сюерча этиудю. Аны ючюн а алагъа тийишлисича онгла къураргъа тийишлиди, ол санда жолланы ишлеу, газны тартыу, суу тохтаусуз келирча этиу. Аланы элледе къалдырыргъа шёндюгюлю жашау журтла, саулукъ сакълауну качествосун ёсдюрюу, инфраструктураны игилендириу, бош заманларын ырахатлы ётдюрюрча жерлени ишлеу болушурукъдула. Мында сабийле ариу халда ёседиле, урунургъа, спорт бла кюреширге эм жетишимли болургъа хазырдыла. 

Былайда уллу магъананы агропромышленный сектор тутады. Биринчиден, ол элчилени иш бла жалчытады, экинчиден, къыралыбызны продовольствие жаны бла тынчлыгъын сакълайды. Алай эсе уа, кеслерини къыйынлары бла ол къоркъуусузлукъну берген адамланы жашаулары да анга кёре тийишлисича къуралыргъа керекди. Бюгюнлюкде Россейни Эл мюлк министерствосу жаш адамла элледе жашаргъа сюерча мадарла этеди, ол санда «Эллени хар не жаны бла айнытыу» деген къырал программа къабыл кёрюлгенди, аны белгиленнген борчланы араларында энчи жерни элледе иш хакъланы шахарладача ёлчемлеге жетдириудю. Андан тышында, къыралны битеу субъектлеринде эл ипотека 3 процентди, былтыр берилген 52 минг кредитден 75 проценти элледе юйле алыргъа  хайырланылгъанды.

Эл жаш тёлюню россейли союз, Росмолодёжь, Россейни Эл мюлк министерствосу, Илму эм бийик усталыкъ билим бериу министерствосу, Урунуу эм социал къорууланыу министерствосу къыралны Президентини буйругъун толтуруучу чегинде «Элге кадрла» деген программаны жарашдыргъандыла. Анга тийишлиликде жаш специалистлени предпринимательствогъа къошуу, алагъа стажировкала бла практикаланы къурау, форумланы ётдюрюу, чыгъармачылыкъ эм спорт-физкультура майданланы къурау дегенча ишле тамамланыладыла. Ала къыралны битеу регионларында 2025 жылгъа дери толтуруллукъдула.

Жыйылыуда чертилгенича, Май район да бу программала бла хайырланаллыкъды. Аны ючюн аграр университетни, колледжлени бошагъан жаш адамла бла байламлыкъла жюрютюрге, ала бла келишимле тауусургъа, сабийлени битимчилик, ветеринария жаны бла билим алыргъа кёллендирирге керекди. Ахырында Юрий Колесников районну жаш тёлюсю эллени айнытыргъа кюреширлерине, аланы аллай итиниулюклери болуруна ышаннганын билдиргенди.