Къурулуш ишлени болжалларына бла тынгылылыкъларына энчи эс бурулгъанды

КъМР-ни Башчысы Казбек Коков бардыргъан кезиулю кенгешде  къурулушлары миллет проектлеге, федерал эмда республикалы программалагъа кёре бардырылгъан социал мекямланы бла жолланы юслеринден сёлешиннгенди. Ол ишлени болжалларына бла тынгылылыкъларына эс бурулгъанды, келир жылгъа борчла да сюзюлгендиле.

Бек алгъа республикалы клиника больницада жангы корпусну ишлеу не халда болгъанына къаралгъанды.  Къурулушчула аны къабыргъаларын  къалап башлагъандыла. Терк стационар болушлукъ берлик эмда саусузланы биринчи болуп аллыкъ бёлюмлери болгъан бу мекям 1,2 минг квадрат метрден аслам жерни алады. Ол хайырланыргъа берилсе, амалсыз болуп келтирилген саусузланы терк окъуна керекли бёлюмлеге ашырыргъа, алай бла ёлюмден къутхарыргъа къолдан келликди.   

 Жангы бёлюмден башхалагъа тынч ётер ючюн а, жети эмда тёрт къатлы мекямлагъа энчи жол ишленирикди. Ол а саусузлагъа, больницада ишлегенлеге да тап келеди.

Саусузлагъа биринчи болуп тюбеген эмда алагъа бек алгъа къарагъан бёлюм   операцияла этген эмда реанимация, халлары къоркъуусуз болгъан саусузлагъа бакъгъан эмда КТ, УЗИ аппаратлары бла да аурууну тохташдыргъан бёлюмледен къураллыкъды.

Амалсыз болуп жетдирилген саусузла мында 3 кюнню турлукъдула, халлары бираз игиленнгинчи. Андан сора башха бёлюмлеге кёчюрюллюкдюле. Ол а хирургия эмда диагностика ишни да игилендирирге онг берликди. Аллай амалны республика къыралда биринчилени санында болуп сингдирликди.

Мекямны келир жылны биринчи кварталында хайырланыргъа берирге белгиленеди, деп билдиргендиле КъМР-ни Башчысыны бла Правительствосуну пресс-службасындан.