Жигитлерибизни излемлери не жаны бла да жалчытылыныргъа керекдиле

Энчи аскер операциягъа къатышханла фронтдан къайтхандан сора иш бла жалчытылынырыкъларына, юйюрлерини кереклерин тамамлаяллыкъларына ышаннгылыкъ болургъа кереклисин белгилеп, Къырал думаны депутатлары бир ненча законну къабыл кёргендиле. Бу статьяда аланы юсюнден билдирирге сюебиз.

Иш бла жалчытыу

Парламентарийле СВО-гъа къатышханланы ишге алгъанлагъа къырал себепликни юсюнден законну проектин биринчи окъулууда къабыл кёргендиле.

Энчи аскер операцияны ветеранларына ишге тохташыргъа, жангы усталыкъгъа юйренирге, кесине бизнес ачаргъа болушлукъ этерге  РФ-ни Президенти Владимир Путин буйрукъ бергенин айтырчады.

Биринчи окъулууда къабыл кёрюлген законопроектге тийишлиликде, гитче эм орталыкъ бизнес бла кюрешгенле   СВО-ну ветеранын ишге алгъан кезиуде, предприятиягъа социал даража берилликди. Алай бла уа тюрлю-тюрлю къырал льготала, себепликле бла хайырланыргъа эркинликни аладыла. «Бир жанындан, закон  энчи аскер операциягъа къатышхан жигитлерибизни ишге алыргъа кёллендирликди бизнесменлени, башха  жанындан а, предпринимательлеге себеплик кючленирикди, алагъа  кенгерирге онгла бериледиле»,-деп белгилегендиле законопроектни авторлары.

Урунуу эркинликле

Ата журтубузну эркинлигин къоруулагъан инсанланы юйюрлери не жаны бла да сакъланыргъа керекдиле. Ол санда ала батыр жууукъларын тас этгенде да. Аны эсге алып, законла чыгъарыучула  СВО-да жан берген аскерчилени  юй бийчелерин ишлеген къуллукъларындан жылны ичинде эркин этерге жарамагъаныны юсюнден  законну проектин хазырлагъандыла. «Юйюрню жашау болуму андан да къыйыннга кетмезче этерге борчлубуз»,-деп ангылатханды проектни авторларындан бири думаны Промышленность эм сатыу-алыу комитетини келечиси Игорь Антропенко.

Документ законла жарашдырыу ишни жалчытыу системада басмаланыпды. Ол къабыл кёрюлсе, ветеранланы юй бийчелерини урунуу эркинликлери юч жылгъа дери сабийни ёсдюрген эмда саулугъуна кёре чекленнген онглары болгъан баланы кеси ёсдюрген аналаны праволарына тенг этилликдиле.

«Аскер операцияны кезиуюнде неда анда алгъан жараладан жан берген  аскерчини юй бийчесин ишлеген жеринде къуллугъундан къыстаргъа жарамайды. Иш бериучю аны бла урунуу келишимни тохтаталлыкъ тюйюлдю, бир-бир кезиуледен башха»,-деп жазылады документни ангылатыу бёлюмюнде.

Бу эркинлик бла аскерчини юй бийчеси экинчи кере эрге чыкъмаса хайырланаллыкъды.

- Аскерчиле Россейни сейирлерин къоруулайдыла, тарых тюзлюкню, сабийлерибизни келир кюнлерин сакълайдыла. Аланы юйюрлерини излемлерин жалчытыу  а тиширыулагъа къалгъанды. СВО-гъа къатышхан батырларыбызны юй бийчелери къырал алагъа къайгъыргъанын сезерге керекдиле,-деп чертгенди Игорь Антропенко.

 Кредитледен эркин этиу

Энчи аскер операциягъа къатышхан кезиуде жан берген неда ауур жаралы болгъан инсан кредит ючюн борчладан эркин этилликди. Ол жаны бла законну проекти  Къырал думаны депутатларыны къараууна сентябрьде берилгенди.

Бюгюнлюкде кредит келишимде ышаннгылы адам ауушса, аны борчлары юй бийчесине неда сабийлерине ётгени жазылыпды законлада.  Алай энчи аскер операциягъа къатышхан аскерчи жан берсе, аны юйюрюне быллай ауурлукъну салыу терс болгъанын айтадыла депутатла.

Аны бла байламлы законопроектде СВО-гъа къатышхан инсан фронда жан берсе неда сакъатлыкъны тапса (1 къауум), кредит келишимде аны ышаннгылылыкъ алгъаны бла байламлы борчлары тохтатылгъанлары жазылыпды.

Полициячыла бла къутхарыучула

Полициячыла эмда МЧС-ни келечилери энчи аскер операцияда жан берселе,  аланы юйюрлерине жашау журт алыргъа тёлеуле этилликдиле. Ол жаны бла законну проекти Къырал думаны къараууна быйыл июльда берилгенди эмда ол биринчи окъулууда къабыл этилгенди. Документ кючюне кирсе,  аны жорукълары бла операциягъа 2022 жылда 24 февральдан къатышханла хайырланаллыкъдыла.

Документде айтылгъаныча, ич ишле органланы, ФСИН-ни, ФССП-ны, МЧС-ни  къуллукъчулары контракт бла къуллукъ этгенде, мобилизация бла чакъырылгъанда неда фронтха кеси ыразылыгъы бла баргъанда СВО-да жан берселе, аланы юйюрлерине, ата-аналарына жашау журт сатып алыргъа неда ишлетирге бир кере ахча тёленирикди.