Ноябрьде къаллай законла ишлеп башларыкъдыла?

Хыйлачы сатыучуладан инсанланы сакълау, банкротлукъну амалларын кенгертиу, шёндюгю технологияланы сингдирген компаниялагъа къырал болушлукъ. Ноябрьде кючюне бу жаны бла законла киредиле. Аланы юслеринден статьябызда билдирирге сюебиз.

Инсанланы сакълау

Инсанлагъа къошакъ товарланы, ишлени, жумушланы къоймай алдыргъанлагъа энди тазир салынырыкъды. Аны ёлчеми 40 минг сомгъа дери жетерикди. Андан сора да алыучуну эркинликлери бла праволу излемлери бузулгъанларыны юсюнден тарыгъыуун тинтирге унамагъанла, аланы тохташдырылгъан низамгъа кёре сюзмегенле да жууап тутарыкъдыла. Быллай бузукълукъла  ючюн тазир иги да уллуду – 300 минг сом.

- Бу закон инсанларыбызны сейирлерин сакълаугъа бурулупду. Бирде сатыу-алыу келишимлеге  адамгъа керек болмагъан, къошакъ товарны неда жумушну алыргъа кереклисини юсюнден жазылады. Сёзге, машинаны алгъанда, салон кеси сайлагъан компания бла страховканы жарашдыртады. Аны хатасындан а  къошакъ къоранчла этиледиле,-деп ангылатханды бу законну  РФ-ни Къырал думасыны башчысы Вячеслав Володин.

 Банкротлукъ, къырал болушлукъ

Банкротлукъну тохташдырыуну низамы кенгертиледи. Аны сюдге бармай тамамларгъа да боллукъду – борч 25 минг сомдан 1 миллионнга дери жетген кезиуде. Пенсиячыла,  неда сабийлеге тёлеуледен башха файдалары болмагъан инсанла, аланы  бир тюрлю мюлклери, ырысхылары жокъ эсе, бу амал бла борч изленип башлагъандан сора, бир жылдан хайырланыргъа эркиндиле. Башхала уа – жети айдан сора.

  «Инновация технологияла», «технологиялы  компания», «гитче технологиялы компания» дегенча ангыламла кийириледиле. Аланы ишлерини энчиликлери, организацияны къурауну, аланы тизмелерин бардырыуну низамлары да тохташдырыладыла. Алай бла уа  бийик технологиялы компанияла, ала артыкъ уллу тюйюл эселе да, къырал болушлукъну алаллыкъдыла.  Дагъыда уллу предприятиялада шёндюгю технологияланы сингдириуню мадарлары да толтуруллукъдула. Закон кючюне 3 ноябрьде кирликди.

Кёп къатлы юйлеге башчылыкъ этген компанияла, ТСЖ-ла, ЖСК-ла, жашау комплексле газ келишимлерин бла указларын  газ бла жалчытыу оборудованияны   тинтиуню юсюнден закон бла келишдирирге керекдиле. Документге тийишлиликде, юйлени эм фатарланы ичлеринде газ ызланы болумларына бир организация  къарарыкъды – газны жалчытыу бла кюрешген.