Таныулу хунери бла кёплеге жарагъан

Къол хунерлери бла айырмалы болгъан адамларыбызны арасында кеслерини билгенлерин бирсилеге да тюшюндюрюп, аладан ыразылыкъ табып ишлегенлерибиз аз тюйюлдюле. Аллайладан бири уа Хочуланы Захидады. Ол Быллымда битеулю билим берген мектепни жетишимли бошагъандан сора, жюрегини излеми бла Нальчикде производстволу комбинатда быстыр тигерге юйреннгенди. Ызы бла уа хунерин Тырныауузда кийим тикген цехде хайырланнганды.

Алай эсе да, ол кесини хунерин андан ары айнытыргъа сюйюп, Ставропольда закройщик-модельерлени школасында окъугъанды. Аны уа ол къызыл дипломгъа тауусханды.

Бир ненча жылны Захида туугъан элинде ательеде адамлагъа юс кийимле тикген жерде ишлеп, жамауатдан ыразылыкъ да тапханды. Аны тутхан ишине уллу кёллю болмагъанын, къол ызы, хунери да айырмалы болгъанын кёрюп, билип, Тырныаууздагъы Элбрус регион колледжде бу усталыкъгъа юйретген ыз ачылгъанында, аны ары дерсле берирге чакъыргъандыла.

Алайды да, аз къалып отуз жылны ичинде ол жаш тёлюню билген хунерине тюшюндюргенлей келеди. Бери уа эм алгъа окъургъа жаланда къызчыкъла угъай, жаш адамла да келип тургъандыла. Мында окъугъанланы асламысы Тырныауузну ательесинде ишлерге барадыла. Бир-бирлери уа кеслери юйде кюрешедиле.

Локияланы Асланны уа энчи белгилерчады. Ол бу колледжде Захида Узденовнаны къолунда билим алгъанындан сора цех ачханды. Анда уа машиналаны шинтиклерине тыш къапла тигедиле. Андан тышында да, Аслан диванланы, креслоланы тышларын жангыртхан хунери бла да белгилиди. Адамла аны ишин жаратадыла эмда сюйюп заказ да бередиле.

Ол окъутхан къызла уа бешик керекле, къагъанакълагъа кийимчикле, терезе жабыула, тёшек-жастыкъ тышла да тигедиле. Бу хунерге уа аланы устазлары кесини билимин, заманын да аямай тюшюндюреди. Алай бла уа ол ишинде да жетишимли болады. 2015 жылда Хочуланы Захида «РФ-ни профессионал билим бериуюню сыйлы ишчиси» деген даражалы атха тийишли болгъанды. Дагъыда ол бийик категориялы устазды.

Андан сора да, ол ишинде сабийлени юйрете, ала бла бирге усталыкъ эришиулеге да къатышханлай турады. Аны къолунда билим алгъан Курданланы Жамиля «Жаш профессионалла» Битеуроссей конкурсну регион урумунда «Моданы технологиялары» деген ызында экинчи, «Миллет кийимле» деген бёлюмюнде уа ючюнчю жерге чыкъгъанды. Гюлюйланы Диана да республикада бардырылгъан кезиуюнде экинчи оруннга тийишли болгъанды («Моданы технологиялары»).

Эсгерте кетейик, арт жыллада усталыкъ хунерге юйретген колледжлени бошай туруп, жашла бла къызла диплом алыр ючюн демонстрациялы сынауну берип тургъандыла. Башхача айтханда, экзамен компьютерни болушлугъу бла бирсиле да кёрюрча болгъанды. Алай эсе да, выпускниклеге сынауну кеслерин окъутхан устазлагъа берирге эркинлик бар эди. Быйыл а ол эркинлик кетерилгенди эмда колледжлени бошагъанла сынауларын сагъынылгъан экзаменлеге деп къуралгъан майданлада бергендиле.

Быллай сынауланы тинтир, алагъа багъа салыр ючюн а сынамлы экспертле керек боладыла. Хочуланы Захида да быйыл аллай экзаменни алырча баш экспертлени тизмесине къошулгъанды. Быллай даражагъа тийишли болур ючюн а, ол кеси да Профессионал билим бериуню айныууну институтунда (ИРПО) сынауланы жетишимли бергенди эмда, белгилегенибизча, энди къыралны къайсы усталыкъ хунерге юйретген окъуу юйюнде да аны сабийледен экзамен алыр эркинлиги да барды. Ангылата кетейик, быллай сынауну выпускникле ГИА-ны орунуна бередиле эмда дипломларын аны эсеплерине тийишлиликде аладыла.

Захида Узденовна колледжге окъургъа, усталыкъ алыргъа жаш тёлю сюйюп келгенин айтады. Бери сабийле тогъузунчу, онбиринчи классланы бошагъанларындан сора келедиле. Быйыл, сёз ючюн, быстыр тигерге тюшюндюрген бёлюмге жыйырма адам аллыкъдыла. Устаз а бюгюнлюкде жаш тёлю хунерлерине тийишлиликде окъургъа сюйгенин, кеслерине ишни да анга кёре излегенлерин белгилейди.

Сынамлы тиширыуну ишден бош заманы аз къала эсе да, жамауат, бютюнда тиширыула, анга быстырланы, терезе жабыуланы, тёшек-жастыкъ тышланы тигерге заказла да бередиле. Ол тикген затла тынгылылыкълары, ариулукълары, качество жаны бла да, игиликлери бла энчиле боладыла. Аны къол ызын а энди сормай таныгъанла да бардыла. Алай болур ючюн а уста къоллу тиширыу Интернетни болушлугъу бла жангы технологиялагъа, амаллагъа юйреннгенлей турады.

Ол дагъыда насыплы анады. Баш иеси бла бирге жашлары Ренатны ёсдюргендиле. Бюгюнлюкде ол КъМКъУ-ну информатика бёлюмюню экинчи курсуну студентиди. Окъууун бошап, халкъына жарагъан адам болургъа сюеди.